Ehl-i Ḥaḳḳ Ḥaydar elinden bāde-nūş-ı cürʿa-keş / Çaġrışur ehl-i ḳıyāmet el-aman u el-ʿaṭeş

Ol ḥaḳḭḳat ṣoḥbetinden muttaṣıl müʾminleriñ / Ḫāṭır-ı ḫurrem feraḥdan göñlü şād u vaḳti ḫoş

Mihr-i āl-i murtażādur mülket-i emn u emān / Yoḫdur o ʿālemde ḫavf-ı kirdār u keşmekeş

Ey muvaḥḥid dār-ı vaḥdetde ʿAlḭdür pādişāh / Tā ebed ḥükmündedür bu se u çār u penç şeş

Rāyic olmaz sḭm-i rūy-endūd ḳalb-i nāṣere / Rū siyehdür her kimin kim olsa ol naḳdinde ġaş

Olmasañ ʿabdal-ı maʿnḭ Ḥaydarı ey şeyḫ-i tund / Fayda ḳılmaz saña bu zerf-i ṣūret rḭş feş

Cān-ı dilden ʿarż-ı ḭmān étmese her kim oña / Baġrını ol kāferḭndür deşne-yi recez ile deş

Pencesinden Ḥaydarıñ bir emledür gūy-ı felek / Emrine Ḥaḳḳdan musaḫḫar pençe u ay u güneş

Yeddi kevkeb yetmiş miñ illik rāhdān-ı merde / Bir ḳadem yoldur anıñ ḳurbinde belki bir arş

Murtażā ʿaşḳında ḳurbān ol ey ehl-i rıżā / Çün ecel senden bu cānı ʿāḳıbet alur ne peş

Bendesidür şāh-ı merdān kullarının Himmetḭ / Bu şerefden ol çekübdür alnına dāġ-ı ḥabeş