Tanı ey dil lā-mekān taḫtında kimdir şehriyār / Mālikü’l-mülk-i velayet ḥākim-i dārü’l-karār / Şeh-suvār-ı ʿarṣa-yı vaḥdet emḭr-i tacdār / Söyledi şānında şāhıñ ol ḥabḭb-i kirdigār / Lā-fetā illā ʿAlḭ lā seyfe illā ẕülfiḳār

Pādişāh-ı evliyāullah emḭrü’l-müʾminḭn / Cümle fermānındadır ḫalḳ-ı semavāt u zemḭn / Leşker-i ervāḥa ser-leşker sipeh-sālār-ı dḭn / Bu ḥadḭŝi yād ḳıldı ṣadrda rūḥu’l-emḭn / Lā-fetā illā ʿAlḭ lā seyfe illā ẕülfiḳār

Nesl-i ādem gelmeden dutmışdı şarḳ ġarbı dḭv / Yeryüzinde cümle kesmişdi ṭarḭḳi ṭarḳ dḭv / Ol zamānda şāh-ı merdān-ile ḳıldı ḥarb dḭv / Gördi Ḥaydardan onda bu dest-i ḍarb dḭv / Lā-fetā illā ʿAlḭ lā seyfe illā ẕülfiḳār

Murtażā ceng-i cebelde ḳıldı ṣamṣāmı ʿalem / Ortasından iki böldi gebri mānend-i ḳalem / Kesdi onda Cebreʾḭliñ şeh-perin şāh-ı kerem / Āferḭn ḳopdı meleklerden felekden dem-be-dem / Lā-fetā illā ʿAlḭ lā seyfe illā ẕülfiḳār

Şḭr-i cebbār-ı tevānā maẓhar-ı yezdān-ı pāk / ʿAnteriñ baġrın velāyet pençesiyle ḳıldı çak / Yeddi yüz miñ kāferi şol yalḳuz eyledi helāk / Ẕevḳédüb çaġrışurdı semekden tā semmāk / Lā-fetā illā ʿAlḭ lā seyfe illā ẕülfiḳār

Ṭay-ı arż-ilen Uḥud ceñāhına érdi revān / Küştegān içinde gördi Muṣṭafā olmış nihān / Ẕülfiḳārı çekdi der-dem her ṭaraf seyl oldı kān / Kim bu ismi oḫudı peyġamber-i āḫir zamān / Lā-fetā illā ʿAlḭ lā seyfe illā ẕülfiḳār

Mancınıḳdan tā selāsel burcına atıldı şāh / Gökden yere endi berḳ-i lāmiʿ tek ol bedr-i māh / Şöyle kim ṭūra tecelli eyledi nūr-ı ilah / Ẕikr u tesbḭḥ eyledi evrāḳ-ı eşcār u giyāh / Lā-fetā illā ʿAlḭ lā seyfe illā ẕülfiḳār

Olmasaydı ẕülfiḳār-ı Ḥaydarıñ ey nḭk-nām / Munda ne ḳavl-i resūl işlerdi ne ḥükm-i kemāl / Añla ey ʿārif tamām oldı kelāmım ve’s-selām / Himmetḭniñ vird-i evrādı budur her ṣubḥ şām / Lā-fetā illā ʿAlḭ lā seyfe illā ẕülfiḳār