Ey dāʾire-i ḥüsne güher-güster-i elmās / Rūyındaki āvīze-i tāb-āver-i elmās / Olmuş felek-i ḥüsnüñ içün Ülker-i elmās / Pervīn-i şeb-i zülfüñ olan aḫter-i elmās / Eyle ufuḳ-ı ʿārżıñı ḫāver-i elmas

Nīsān olur ehl-i baṣarıñ ḫūn-ı sirişki / ʿUmmān olur ehl-i kederiñ ḫūn-ı sirişki / Virān olur ehl-i hüneriñ ḫūn-ı sirişki / Bārān olur ehl-i naẓarıñ ḫūn-ı sirişki / Berḳ ursa meyānında ne dem ḫançer-i elmas

Bir ḫūnī-i çālāk imiş ol ġonca dehen āh / İnṣāf vire tā dil-i senginine Allah / Şekker didigi rīze-i billūr imiş eyvāh / Pür-zehri ḳılub ḫande-i zīr-i lebin ol māh / Virdi dil-i ṣad pāreye gül-şeker-i elmas

Mümkün mü ola mihr-i ser-i şöhrete efser / Bilmem a begim ne bu nümāyiş ne bu zīver / Erbāb-ı ṣuver ehl-i dile ṣanma ki beñzer / Bī-maʿni vü bī-ḫāṣṣedür yār lebin ekser / Kim gördügi var ḫātem-i nām-āver-i elmas

Bī-çāre Haydar-ı nigeh ḥükemā ḳand-ı nebātı / Ẓulmetde bulur Ḥıżır daḫi mā-i ḥayātı / Efzūn ider ḫaber-i siyeh ḳadr-i ruvātı / Kem-māyeleriñ cevri açar cevher-i zātı / Üsrüple tırāşīde olur peyker-i elmās

Meyḫānede ne sübḥā ne seccāde gerekdir / Ney mey gibi şeyler faḳaṭ āmāde gerekdir / Muṭrib de gerek sākī-i ṣahbā da gerekdir / Revnaḳ viremez bezme ʿaraḳ-ı bāde / Ḫūrşīd iledir cilve-i nūr u fer-i elmas

Bu daġdaġa-i manṣıb u naḳdine-i vāfir / Ehl-i hünere olsa da bir olmasa da bir / Virān maḥallerde olur genc-i cevāhir / Zer-dūz bisāṭ istemez erbāb-ı meḳādir / Bir sīm nigīndān yetişür pister-i elmas

Bir kāfir içün kendümi bir ḫaylice yordum / Bir iş görüb āḫir anı da ḫalḳa ṭuyurdum / Aldım elime bir iki ṭaş yoluna ṭurdum / Aġyār-ı segi seng-i reh-i yārla urdum / Çāsār-ı Frenk oldı giyüb efser-i elmas

Düşmüş yola mestāne o ḫūrşīd-i cihān-sūz / Girmiş yine devrāne o ḫūrşīd-i cihān-sūz / Māʾildir iki yana o ḫūrşīd-i cihān-sūz / Çıḳmış yine meydāna o ḫūrşīd-i cihān-sūz / Bālā-yı belā-ḫīzüñ idüb maḥşer-i elmas

Düşdükce ʿaraḳ ʿārıż-ı dil-dāre ṣanursun / Nīsān yaġar ʿarṣa-i gülzāre ṣanursun / Her ḳaṭresini bir dürr-i şehvāre ṣanursun / Ḫoy gerde ruḫ olduḳca o mehpāre ṣanursun / Gül-bergine şebnem ola āb-ı ter-i elmas

Nūrī o gülistāna göñül oldu ki rāġıb / Her mıṣrāʿı ʿūd aġacı dinse münāsib / Noḳṭa degil ʿanber ṣaçılur çār cevānib / Pür-būy-ı maʿnī mi devātum gibi Ġālib / Ser bezm-i selātīne gelen micmer-i elmas

Virsün heves-i şöhreti vaḳtimi bāde / Sürsün yüzini gerd u ġubāre pes bāde / Elbette çün āyīne olur jengi güşāde / Ṭursun naẓar-ı terbiyyet şems-i Ḫudāda / Vaḳtiyle olur seng-i siyeh gevher-i elmas