Yaḳḭniñ bil tapdı tḭġından ʿAlḭniñ mülk-i dḭn revnaḳ / Ḥaḳḭḳatde esās-ı enbiyā-yı mürselḭn revnaḳ

Ḳuşandı ẕülfiḳārı tā resūlüñ ʿarşına vérdi / İmām-ı evliyā yaʿni emḭrü’l-müʾminḭn revnaḳ

Muḥammed ʿaşḳına meydāna sürdi düldüli Ḥaydar / Getürdi maḳdeminden ʿarṣa-yı rūy-ı zemḭn revnaḳ

Ẓuhūra gelmeseydi ʿayn u lam u ya bu ebcedden / Ki bulmazdı bu yetmiş yeddi ḥarf-i ya u sin revnaḳ

Ṭuluʿ étmezdi ger nūr-ı ʿAlḭ burc-ı velāyetden / Ṣafā-yı ṣubḥ-dem bulmazdı bu çarḫ-ı zḭn revnaḳ

Meger nuṭḳ-ı ʿAlḭden bḭ-ḫaberdür vech-i Aḥmedden / Vérür bu ṣūret-i bḭ-maʿnḭye naḳḳaş-ı çḭn revnaḳ

Vücūd-ı ḥaydarıñ çün noḳṭa-yı pergār-ı vaḥdetdür / Bulupdur ʿaşḳ-ı evvel noḳṭadan bu māʾ u ṭḭn revnaḳ

Faḳḭr u müflis u bḭ-revnaḳam lḭkin yaḳḭnim bu / Vére ümmḭd-vārım bu daḫı nūr-ı yaḳḭn revnaḳ

Sevādü’l-veche fiddāreyndür bu faḳḭrimiz amma / Vérür o ḥüsn-i maḥbūba sevād-ı ʿanberḭn revnaḳ

ʿAlḭ mihriyle ḫalḳ étdi bu cism-i cānımı ḫālıḳ / ʿAlḭ şevḳiyle saldı cānıma cān-āferḭn revnaḳ

İşitdi Himmetḭniñ naẓmını bu medḥe semʿ oldı / Ṣadef-i ḳalbinde andan baġladı dürr-i ŝemḭn revnaḳ