Ol ‘akse ḥased kim görür endāmını yāruñ / Sīm-āba döner ḳalbi hemān ‘āşıḳ-ı zāruñ

Bu bāġ-ı terüñ sünbüli de müşge yaḳīndür / Ta‘bīr idemem būyını ben zülf-i nigāruñ

Gāhī semene geh güle geh ‘ıṭra mümāsil / Şeft-ālū gibi şāmmede būy-ı ‘iẕāruñ

Bir naġme içün ḫayli ḫırāşīdelük eyler / Beyninde ne ṭanbūr ile mıżrāb ile tāruñ

Ne rengi ne būyı olur evrāḳ perīşān / Az vaḳtile te’sīr-i figān ile hezāruñ

Toḫm-ı emeli ekmek içün besleme sevri / Ḥāżır bulınur mezra‘ada belki şiyāruñ

Ehl-i hünerüñ gerdişi yek-sā‘a ḳadardur / Ey çarḫ senüñ sāniyeli yoḳ mı ‘ayāruñ

Farḳ eyle bu elfāz ile fārisleri şāhum / Bu naṭ‘-ı ma‘ānīde piyādeyle süvāruñ

Nābīye nerm-revlik ider gāhīce Ḫāliṣ / Bu ḫāme-i edhem-revişüñ yoḳla ḳayāruñ

Sāmān-ı cevābı ile pā-bend olur āḫir / Ḫaylice bilür pertev-i üstād-ı gubāruñ