Nigāh-ı nergis-i taṣvīrine i‘ādemüzi / O şūḫ çeşmine ṣarf itmedi irādemüzi

Düşerdi berg-i ‘iẕār üzre şeb-nem-i çeşmüm / Rubūde eylese mihrüñ dil-i fütādemüzi

Hezār nālişi ol ġonca zīr-i gūş itmez / Hezār [u] bülbüle virmez leb-i güşādemüzi

O duḫter-i reze meclisde daḫl idüp vā‘iẓ / Lisānı ḥurmete almış efendi-zādemüzi

Keş-ā-keş-i ruḳabā ḳoymadı ne tīr ü kemān / Ḳırup ġubār-ı ḫaṭı çille-i kepādemüzi

‘İnān-ı eşheb-i nāzuñ ṭutup o pīl-raḳīb / Ḥużūrı şāh-ı ġama sürdiler piyādemüzi

Bilād-ı rābi‘ası çār-ṣūret-i ḫaṭ ile / Düşürdi ḫıṭṭa-i Şāma mevālī-zādemüzi

Olursa mevsim-i vaṣl-ı ḳalemde ……-delüm / Ney-i şeker ile kilk-i Ḫudā-yı dādemüzi

‘Aṭāsı Ḫāliṣe taḳsīmden muḳaddemdür / Viren cenāb-ı Ḫudā rızḳ-ı nā-nihādemüzi