Çıḫdı kenzullahdan bir gevher-i ʿālem-fürūz / Baḫdı dḭdār-ı ḥabḭbullah evvel açdı göz

ʿĀleme bir nūr-ı vāḥiddür bir menzili bildirmege / Oldı ḫurşḭd ḳamer iŝbāt évinde yüz-be-yüz

Ol yedullah el çıḫardı leyletü’l-miʿrācda / Aḥmede gösterdi ol dem sırr-ı maḳdemden rumūz

Ẓāhir étdi küntü kenzen perdesinden ẕātını / Raḥmetinden ḫālıḳın açıldı kevnine künūz

Ṭalʿatından nūr éden arż u semāya her ṣabāḥ / Pertevidür Ḥaydarıñ ḫurşḭd-i ʿālem-tāb-ı rūz

Nūr-ı şemʿ-i Muṣṭafādur ʿaşḳ-ı pāk-ı murtażā / ʿĀşıḳıñ cānıñdaki şol āteş-i endḭşe-sūz

Ṣāmit ol ḳavl-i kelām-ı nāṭıḳa ḭmān getür / Çoḳ uzatma ḳıṣṣā-yı kūtāh ile söyle az

Ṣarf-ı evḳāt eyleme bir maʿnḭsiz efsānedür / Olmasa medḥ-i velḭyyullah her güftār söz

Fi’l-meŝel bir beyżedür destinde onuñ felek / Çarḫ-ı gerdūn günbed-i devvār tā ḥaddād göz

Çünki bu taḥḳḭḳe érmez ehl-i teşkḭk kemāl / Tḭġ-ı tevḥḭd-ile der-dem başını cisminden üz

Baḫmadı ol merd-i merdān bu cihān-ı ḳaḥbeye / Bḭ-vefādur nişe kim bu bḭ-ḥayā dehr-i ʿacūz

Himmetḭ Ḥaydar muḳaddemdür vücūd-ı ʿāleme / Var-iken ol ẕāt-ı muṭlaḳ yoḫdı eşyā henüz