Yā ʿAlḭ yā şeh-süvār-ı ʿarṣa-yı meydān-ı ʿaşḳ / Maẓhar-ı maʿşūḳ-ı ʿāşıḳ server-i merdān-ı ʿaşḳ

ʿAşḳdır sulṭān egerçi on sekiz miñ ʿāleme / ʿĀlem-i ḳuvvetde sensen yā ʿAlḭ sulṭān-ı ʿaşḳ

Tanıya ol gün ḫalāyıḳlar seni ey sırr-ı Ḥaḳḳ / Onda kim peydā ola bu ḳıṣṣā-yı pinhān-ı ʿaşḳ

ʿAşḳ çevgānı önünde nuh felek bir gūy-imiş / Sendedir vusʿat-i ḳudret-i Ḥaḳḳdan ol çevgān-ı ʿaşḳ

İns u cinne vaḥş-ı ṭayra ʿaşḳdır fermān revā / Ey bu şehrin ḥākimi ḥükmündedür fermān-ı ʿaşḳ

Ḳaṭredir baḥr-ı vücūdundan vücūd-ı kāināt / Dürr-i deryā-yı necef ey gevher-i ʿummān-ı ʿaşḳ

Nuṭḳ-ı fermān-ı Muḥammed maġz-ı ẕāt-ı ʿārife / Ḥaṭṭ-ı vechḭdir ḥaḳḭḳat ehline Ḳur’ān-ı ʿaşḳ

Mektebinde ʿaḳl-ı küll bir ṭıfl-ı ebced-ḫānıdır / Murtażādır yaʿni üstād-ı pḭristān-ı ʿaşḳ

“Lev-keşef” Ḥaḳḳdan ʿAlḭ şānındadır hem “men ʿaref” / Vezn-i ʿaḳl-ı ʿadl u nefs-i keffe-i mḭzān-ı ʿaşḳ

Ol saḫḭ her sāile vérdi mükerrer cān u baş / Aḥsenullah Ḥaḳḳ ṭarḭḳinde budır imkān-ı ʿaşḳ

Ẓāl-ı raḥmet nūr-ı ʿizzet ḳāsım-ı ḫān-ı behişt / Şemʿ-i cemʿ u mḭr-i meclis sāḳḭ-yi mestān-ı ʿaşḳ

Şāh elinden içmedi peymāne ey Himmetḭ / Dolmasa her kimsede şol ʿahd-ı ezel peymān-ı ʿaşḳ