Ey derd-i ʿaşḳ noḳṭa-yı tevḥḭd sırr-ı ẕāt / ḭcād-ı ḫalḳ maẓhar-ı müstecmiʿ-i ṣıfāt

Defter-nüvḭs-i leşker-i ervāḥ-ı cinn u ins / Ey naḳşbend-i ṣūret-i mecmūʿ-i mümkünāt

Ṭuġrā-keş-i nişān-ı ġażā münşḭ-yi ḳadr / Müstevfḭ-yi cerḭde-yi ʿamāl-i külliyāt

Bes bir raḳam ki çekse ḳalem levha sefḭddür / Yaʿni hesāb-ı cümle-i zerrāt-ı kāināt

Pergār-ı nefs dāire-yi ʿaşḳ ʿaḳl u cān / Üç rūḥ dört ʿenāṣır beş ḥiss şeş cihāt

ʿAllām-ı ʿilm-i ẓāhir u bātın pes ey velḭ / Dānā-yı külli ḥālet u ḥallāl-i müşkilāt

Baḥr-ı zülālḭ Ḫıżra véren cām-ı sermedḭ / Deryā-yı cūd sāḳḭ-yi ser-çeşme-yi ḥayāt

Her cān ki işdi bir ḳadeḥ olsun olmadı / Cāvḭd ḳaldı tā-be-ebed ḥayy-yi lā-memāt

Her rūz ʿıyd her géce ḳadr berāt olur / Enʿām vérdi her ḳavle kim yazdı şeh berāt

Her ḫāricḭ ki Ḥaydara göñlünde dutdı buġż / Ṭūfāna gitdi bulmadı ol zevraḳ necāt

Kim āl-i Ḥaydarı özine ḳıble bilmedi / Maḳbūl-ı Ḥaḳḳ degildür onuñ ḳılduġı salāt

Ḥācı degil bu ḳaʿbe-yi taḥḳḭḳe ḭzedi / Dāim perestiş étdügi bir deyr içinde Lāt

Oynatdı atını biş gün bu ʿarṣada / Fil bende düşdi ʿāḳıbetü’l-emr oldı māt

Ṭabʿ-ı selḭm-i Himmetḭ medḥinde Ḥaydarıñ / Oldı revāne baḥr-ı feṣāḥatde çün Fırāt