Aḥmede ġam-ḫor ʿAlḭdür ʿAlḭ / Mūnis-i dil-dār ʿAlḭdür ʿAlḭ

Laḥmeke laḥmḭ ṣıfatıñ gösteren / Hem-nefesi yār ʿAlḭdür ʿAlḭ

Leyletüʾl-esrāda ḥabibiñ yaḳḭn / Gördigi dḭdār ʿAlḭdür ʿAlḭ

Muḥterem şol ḥarem-i kibriyā / Maḥrem-i esrār ʿAlḭdür ʿAlḭ

Fānḭde her laḥẓa géyek bir libās / Dilber-i ʿayyār ʿAlḭdür ʿAlḭ

Ẕātını her laḥẓa ḳılan ʿāleme / Gün teki iẓhār ʿAlḭdür ʿAlḭ

Ẓulmet-i şāmı ʿadem-i nūr éden / Şuʿle-yi envār ʿAlḭdür ʿAlḭ

Dem-be-dem iŝbāt-ı Ḥaḳḳ içün gelen / ʿĀleme tekrār ʿAlḭdür ʿAlḭ

Merkez-i dil ḳuṭb-ı zemḭn u zamān / Noḳṭa-yı pergār ʿAlḭdür ʿAlḭ

Mūsḭ-yi ʿİmrāna ennallah déyen / Meşʿale-yi nār ʿAlḭdür ʿAlḭ

Şḭr-i ḫudāvend şeh-i ẕülfiḳār / Ḳātil-i küffār ʿAlḭdür ʿAlḭ

Bezm-i ḳıyāmetde véren cām-ı cem / Sāḳi-yi ebrār ʿAlḭdür ʿAlḭ

Uyuma bu ġafletden oyan Himmetḭ / Devlet-i bḭdār ʿAlḭdür ʿAlḭ