Bu vechi bilmeyeñ sebʿu’l-meŝānḭden ḫaber bilmez / Kelām-ı hüve’l-kitāb-ı āsımānḭden ḫaber bilmez

Bugün nuṭḳ-ı ʿAlḭden āb-ı ḥayvān içmeyen ḥayvān / Dem-i bāḳḭ ḫayāt-ı cāvidānḭden ḫaber bilmez

Şehādet şehrine emr-ile munca enbiyā geldi / Biri şol ḳıṣṣā-yı berd-i yemānḭden ḫaber bilmez

Neden kim Ḥaḳḳ teʿalḭden velāyet mülkidür bāṭın / Velḭden özge bu sırr-ı nihānḭden ḫaber bilmez

Dédi erne münācātında Muʿsḭ-yi kelḭmullah / Feemmā ev ḫıṭābı lenterānḭden ḫaber bilmez

Vücūd-ı Murtażānı maẕhar-ı Ḥaḳḳ bilmeyen cāhil / Cihānda ehl-i ṣūretdür meʿānḭden ḫaber bilmez

Alḭden özge bu bāzār içinde kim ki medh eyler / Bu ki ḫar-mühredür yāḳūt-ı kānḭden ḫaber bilmez

Oña kim olmadı rūşen bu yüzden maʿnḭ-yi hüdhüd / Süleymān tek zebān-ı bḭ-zebānḭden ḫaber bilmez

Göñül vérse ʿAlḭ mihrinden özge yāre her ʿāşıḳ / Bes nādān-ı cāhil yār-ı kānḭden ḫaber bilmez

Şarāb-ı şevḳ-i Ḥaydardan ḳadeḥ-nūş étmeyen ṣūfḭ / Zülāl-ı ḫıżr-ı āb-ı zindegānḭden ḫaber bilmez

Maña dünyā-yı dūn-perver ḫesābın śorma ey münʿim / Gedā hergiz umūr-ı mülk-i fānḭden ḫaber bilmez

Ḳılubdur Himmetḭ bu yolda çün destār-ı terkḭn / Külāh-ı Ḫüsrev tāc-ı Kiyānḭden ḫaber bilmez