ʿAlḭdür kāinātıñ ḫalḳına şāh-ı velḭniʿmet / Véren bu külli maḫlūḳa ʿAlḭdür ey velḭniʿmet

Vekḭl-i muṭlaḳ maḳṣūd-ı rabbü’l-ʿālemin oldur / Kimi ḫar eylese eyler ve ger ḳılsa ḳılur ʿizzet

ʿAlḭdür emr-ilen iki cihānıñ mülkine mālik / İmām-ı ins ve’l cinn ḳasḭm-i nār u cennet

Oḫı nād-ı ʿAlḭ ḫayl-i ʿadūdan fāriġ ol ey dil / ʿAlḭden özgesi yoḫdur ve-lā-ḥavle ve-lā-ḳuvvet

Dilinden ḳoyma ey dil lā-fetā illā ʿAlḭ şarḥın / Budur müʾminlere naṣrun-min-Allāh āyet-i nuṣret

Ḥaḳḭḳatde ʿAlḭ melmūs-ı ẕātullah-imiş çünki / İki görmez çü aḥvel ol şibh-i ẕātı ṭālib-i vaḥdet

Hemān bir nūr-ı vāḥiddür vücūd-ı ʿālem u ādem / Nedür bu arada pes iḫtilāf-ı ʿālem-i ṣūret

Kerem deryāsıdur maʿnḭde ol sulṭān-ı dil-perver / Gelür andan demādem cümle ḫalḳa lücce-yi raḥmet

Bugün şāh-ı velāyet dameniñ ṣıdḳ-ile muḥkem dut / Ki aṣlā eylemez maḥşer güninde çektigiñ hasret

ʿAlḭdür ḥākim u hem nāżır u dḭvān-ı ḥaşr u neşr / Kim oldur ümmete yevmü’l-ḳıyāmetde ḳılan şefḳat

Dilersen aḫretde Muṣṭafā ḫoşnud ola senden / ʿAdū-yı ehl-i beyti ṣıdḳ-ilen ḳıl dāimā lāʿnet

ʿAdū-yı dḭnine manṣūr u muẓaffer olmaḳ istersen / Demādem āl-i Ḥaydardan dile ey Himmetḭ himmet