Elā ey ġonca-i gülzār-ı firḳat / Ḫaṭṭ-ı ruḫsārı sünbülzār-ı firḳat

Nihāl-i ḳāmetiñdir naḫl-āşūb / Şekerli lebleriñdir bār-ı firḳat

Ḫayāl-i ḳaddüñ özge mā-cerādır / Sirişkim eyledi enhār-ı firḳat

Ġamıñla güller açdı dāġ-ı cismim / Bu yüzden rū-nümā ezhār-ı firḳat

Göñül bülbüllenür bāġ-ı emelde / Velī dört yanın almış ḫār-ı firḳat

Dem-i dilden ṭolar ey mest-i nāẓm / Gözümdür sāġar-ı ser-şār-ı firḳat

Ne ṣūretle alur baḳ çeşm-i cānı / Bugün āyīne-i āzār-ı firḳat

Bihişt-i ʿAdne girmezmiş şeyāṭīn / Neden girdi dile efkār-ı firḳat

Hevā-yı ḫaṭṭ u zülfüñle olurlar / Göñüller ḳūt-ı mūr u mār-ı firḳat

Muḳīm-i deyr-i ʿaşḳıñ ey büt-i nāz / ʿAceb mi baġlasa zünnār-ı firḳat

Aṣıldı zülfüne mānend-i Manṣūr / Bedīdār oldı cānā dār-ı firḳat

Gezen elden ele kālā-yı dildir / Bütandır ḫ˅āce-i bāzār-ı firḳat

Bedel naḳdine-i cānlar alurlar / Ḳumāş-ı ḥüsnüne dil-dār-ı firkat

Bilindi maʿnā-yı ḳadr-i vefāmız / Açıldı muṣḥaf-ı esrār-ı firkat

ʿAceb mi Nūrīyā şām-ı emelde / Görünse mihr pür-envār-ı firkat