ʿAlḭdür ḳāimen bi’l-ḳısṭ şāh-ı ekrem u ʿādil / ʿAlḭdür ḥüccetü’l ḳāim imām-ı ekmel-i kāmil

ʿAlḭdür ʿālim u kāşifullahıñ ẕātına ʿārif / Ne ḥaddi var aña mānend ola her nāḳıṣ u cāhil

ʿAlḭden özgeye ḳılma tevellā sen teberrā ḳıl / ʿAlḭdür maẓhar-ı ẕāt-ı hüviyyet ġayr-ı hū bāṭıl

Velḭyullaha nisbet ḳılma her mechūl nādānı / Berāber mi ḳılur ḫar mühreye dürdāneni ʿāḳıl

Ḥimāyet ḳılmasaydı maʿnḭ-yi bāṭında ol ḫākim / Ḳalurdı ṣūret-i ẓāhirde ḥükm-i enbiya ʿāṭıl

ʿAlḭden buldı fetḥu’l-bāb yaʿni ʿilm-i dḭn şehri / ʿAlḭ şanında Ḥaḳḳdan ẕülfiḳār innemā bāṭıl

ʿAlḭdür fırḳa-yı ebrāra Ḥaḳḳdan nāṣir u nuṣret / ʿAlḭdür zümre-yi eşrāra Ḥaḳḳdan hālik-i ḳātil

ʿAlḭdür Aḥmediñ doġru refḭḳi Ḥaḳḳ ṭarḭḳinde / ʿAlḭdür Aḥmediñ cismi içinde cānı el-ḥāṣıl

Fedā ḳıldı Muḥammed ʿaşḳına ol ʿāşıḳ u ṣādıḳ / ʿAlḭden yetmiş iki ḳātile kim baş istedi sāil

ʿAlḭ Ḥaḳḳdur el-ḥaḳḳ bile eylemek şābāş / Güẕer ḳıldı cihān u cānı bir cov olmadı māil

ʿAlḭ mihri menim cānımda çün naḳş-ı ḥacer ḳāim / Eger ṭūfān ḳopar bir ḥarfi anıñ olmaya zāil

Ṣırāṭullāha maḥşerde ʿAlḭdür rehber-i rehrev / Geçenler bu ṣırāṭullāhı oldı Ḥaḳḳına vāṣıl

ʿAlḭdür Himmetḭ bil yerde gökde ḥāżır u nāẓır / Eger ṣāḥib naẓarsan olma andan her naẓar ġāfil