Gel ey ʿaşḳ-ı muḥabbetden uran lāf / Bu yolda naḳd-i cānı eyle ṣarrāf

Dilerseŋ sāḳḭ-yi kevŝer elinden / Ḳıyāmet ṣoḥbetinde bāde-yi ṣāf

Göñül ṣāf ét ṭaleb ḳıl luṭf elinden / Anıñdır dāimā iḫsān-ı elṭāf

Olur ʿuḳbāda āzād-ı müsellem / Aña her bende ki tapşurdı inṣāf

ʿAlḭdür ḳāimen bi’l-ḳısṭ-ı ve’l-ʿadl / Anıñ-çün dér “ene ricālü’l āʿrāf”

ʿAlḭdür seyrine yeddi kitābıñ / ʿAlḭm u vāḳıf u ʿallām-ı keşşāf

Żamḭr-i cümlenin ʿilmine Rūşen / Bilür zḭrā keṣāf ḳalbi ṣarrāf

Kerem baḥrında ʿālem bir ṣadefdir / Kim anıñ ẕātıdır çün dürr-i şeffāf

Vücūd-ı kāināt o dürrden oldı / Ẓuhūr-ı nūn-ı maʿnḭ ṣūret-i kāf

Cihān bir beyżedür destinde yekser / Yeddi yer nuh felek nuh ḳülle-yi ḳāf

Naẓar ḳıl Himmetḭ şol āftābe / Dolupdur pertevinden cümle eṭrāf