ʿAlḭdür mebdeʾ u mḭʿād-ı eşyāʾ evvel u āḫir / ʿAlḭdür menbaʿ-ı deryā-yı raḥmet bāṭın u ẓāhir

Naẓar her ḫānde kim ḳılsañ güneş tek anda ẓāhir gör / ʿAlḭdür her maḥall her mekānda ḥāżır u nāẓır

Ḳarār étmez zemḭn u āsmān ay gün doġmaz / Yakḭn bil olmasa şāh-ı velāyet bir nefes ḥāżır

Doḳḳuz ʿarşınıñ sütunı yeddi ferşiñ lengeri / Oldur velḭ-yi muṭlaḳ ḫallāḳ-ı ʿālem maẓhār-ı ḳādir

Eger ʿirfān-ı kāmil-sen kiminçün durdı fikr-eyle / Muʿallaḳ bḭ-ṭanāb bḭ-sütūn bu nilgūn çadır

Bu munca ḳuvvet u ḳudret ki luṭf étdi oña yezdān / Ḫilāf-ı emr ondan bir ser-i mū olmadı ṣādır

Velḭ-yi Ḥaḳḳ ḳāimen bi’l-ḳısṭ şāh-ı ʿadl-i bā-iḥsān / Kerem kānı saḫāvet maʿdeni ol raḥmet-i sāir

Beridür fuḥş-ı ʿiṣyān u ḫaṭā u her menāḥḭden / İmām-ı pāk-i maʿṣūm u muḳaddes ṭayyib u ṭāhir

Harḭm-i ḥürmetinden enbiyā u murselḭn ḫādim / Muʿallā āstānında anıñ kerrūbḭler zāir

Anıñ ḥamdin éderler muttaṣıl gökde melāikler / Anıñ ʿaşḳına olmışdur felekler dāimā dāir

Kimiñ şānındadur levlāk tā Ḥaḳḳdan ḫitāb olur / Ḫaber dut bu ḫaberden yoḫsa oldun müşrif ḥāsir

Muḥammeddür ʿAlḭdür Fāṭımā Şubeyr u Şeberdür ʿAlḭ / Ŝāni-yi Seccāddur Muḥammed yaʿni ki Bāḳır

İmām-ı meẕheb-i Ḥaḳḳ dḭn-i Ḥaḳḳ şol Caʿfer-i Ṣādık / Şehen-şāh-ı cihān Mūsā-yı sāni ḳātil-i sāḥir

ʿAlḭ Mūsā Rıżā ehl-i rıżā-yı kaʿbedür kuʾyi / Taḳḭ u hem Naḳḭdür devlet hem dḭn hem māhir

Ḥasan kim ʿAskerḭdür evliyā u etḳıyā anıñ / Fütūḥ-ı kişver-i ḭmān şikest-i leşker-i kāfir

Muḥammed mehdi-yi ṣāḥib-zamāndur ġayb-ı muṭlaḳdan / Ricāl-i ġayb-ilen ẓāhir olan müʾminlere nāṣir

Bugün āl-i ʿabā ʿaşḳına bir şāl iḫtiyār eyle / Eger kim ister olsun aḫretde ḫalvet-i ḥāżır

ʿAliyyü ʿāliyyu āʿlāya oldı Himmetḭ bende / ʿUrūc étmez velāyet evcine her himmeti ḳāṣır

Tevekkül menzilinde olmışam iḫlaṣ-la sākin / ʿAlḭ yolunda her ne gelse şākirem ṣābir

Günāhıñ ʿafv ḳıl bu Himmetḭniñ yā velḭyullah / Bḭ-Ḥaḳḳ-ı ḥürmet-i Selmān u Būzer Ḳamber u Cābir