Her belā gelse ʿAlḭ yolunda ṣabrét ṣābir ol / Her cefā çeksen ʿAlḭ ʿaşḳında şükrét şākir ol

Kim ki menzil kesmek isterse götürmez ʿöẕr-i leng / Kāhil nefes olma rāhında ʿAlḭniñ şāṭır ol

Gel vücūduñ kişverinden leşker-i şeyṭānı sür / Olma ʿāciz merd-iseñ bu kelb-i nefse ḳādir ol

Ḳavl-i Ḥaḳḳdır kāfir u müşrik necisdir miŝl-i ḫūk / Bu necāsetden muḥibb-i Ḥaydar-iseñ ṭāhir ol

Ḫāricḭ kāfirden eksükdür münāfıḳ kelbden / Bu ḥadḭse yaḫşı fikr-eyle özünden ṣādir ol

Daʿvḭ-yi ḭmān éderseñ çek velāyetden sipāh / Ḳıl siyāset birle şehr-i küfr-i ḳatl ḳāḥir ol

ʿAşḳ sulṭānıyla cān iḳlḭmine ḳur ʿadl u dād / ʿAḳl mḭzāniyle dāḭm bu mḭzāna nāẓir ol

Nūra dönder mihr-i Ḥaydardan vücūduñ ẓulmetiñ / Gir gönül ḳaṣrın ʿimāret ḳıl hemḭşe ʿāmir ol

Pāk-i ṣāf ét zeng-i ġafletden ẓamḭr āyinesin / Her zamān anda ṣafā kesb-eyle Rūşen ḫāṭir ol

Bir naẓar ḳıl andan ol āyine-yi ʿayne’l-yaḳḭn / Tā saña maʿlūm ola kim evvel oldur āḫir ol

Her ṣıfatdan ʿāleme ẕāt-ı ʿAlḭdür cilve-ger / Gün teki her ẕerreniñ ʿaynında nūr-ı ẓāhir ol

Himmetḭ bu ʿarṣada nefs-ile ḥarb étmekdedür / Bendeñe bu işde yā şāh-ı velāyet nāṣir ol