Ey ġamzesi mest-i ḫ˅āb-ı ʿişve / Şevḳ-i ruḫı mehtāb-ı ʿişve

Ey teşne-i āb-ı viṣāl olan dil / Mevc-āver olur serāb-ı ʿişve

İḳlīm-i ümīdi ol Hülā-gū / Ser-tā-ser ider ḫarāb-ı ʿişve

Bezm içre olursa nuḳl-ı laʿliñ / Eşkim ola mı şarāb-ı ʿişve

Ṣu virdi nihāl-ı vaṣl-ı yāre / Müjgānım olub seḥāb-ı ʿişve

Eşkimle ṭolar gül-i piyāle / Çün jāle olub ḥabāb-ı ʿişve

Ol gerdan-ı ṣaf ṣubḥ-ı ümmīd / Ruḫsāresi āfitāb-ı ʿişve

Maʿnā-yı ḫaṭṭı ḥadis-i vuṣlat / Mefhūme-i nev-kitāb-ı ʿişve

Eyler lebi baḫşiş-i tekellüm / Elbet açılur o bāb-ı ʿişve

Dil yād-ı lebüñle cām-ı pür-ḫūn / Hecriñle ciger kebāb-ı ʿişve

Gül rūyına ebr-i zülf-i müşkīn / Efşān ider gül-āb-ı ʿişve

Āsar yemm-i füyūż-ı şemsdir / Göñlümde bu āb u tāb-ı ʿişve

Nūrī-i himem cenāb-ı ḫünkār / Eyler beni kām-yāb-ı ʿişve