La‘l-i nābuñ yād ile leẕẕet helāk eyler beni / Çeşm-i maḫmūrında keyfiyyet helāk eyler beni

Almasam āġūş-ı ḫulyāya ḫayāl-i vuṣlatuñ / Nīm-laḫẓa sūziş-i ḥasret helāk eyler beni

Eylesem de ol ġazāli zīver-i deşt-i ḫayāl / Ġamze-i çeşmindeki vaḥşet helāk eyler beni

Şevket ü dārāt u şānuñ ḫaṭ ile itdi ẓuhūr / ‘Āḳıbet bu behcet ü devlet helāk eyler beni

Merdümān-ı çeşminüñ āzādesi olsam daḫı / Ġayret-i aḳrān-ı ḥürriyyet helāk eyler beni

Ḫayli dem rū-mālsin ey mīl-i sürme çeşmine / Yārda bu sürme-i ḳudret helāk eyler beni

‘İllet-i naḫvet seni dil-ḫaste-i nāz eylemiş / Ey ṭabīb-i ‘ışḳ bu ‘illet helāk eyler beni

Merdüm-i çeşm ile istīnās idermiş bir perī / Bu ḫilāf-ı cins ile ülfet helāk eyler beni

Ġamz-ı çeşmi nükte-i sırr-ı femüñ īmā ider / Çeşm-i gūyāsındaki ṣoḥbet helāk eyler beni

Çeşm-i nergis tā ezel olmış mey-i ser-mest-i nāz / Ḫāliṣā ol bāde-i naḫvet helāk eyler beni