Kitāb-ı ṣafḥa-i ruḫsārı bellü ḫaṭṭ u hāmişden / Düşürdi ‘āşıḳı bu nāz u istiġnāsı ḫāhişden

Raḳībe itdigün evżā‘ı hep bir bir beyān itdi / Ḫaber virdi münāfıḳmış baña yüksekden inişden

Ḳad-i bālā-yı yār ile vefā-yı ‘ahdi seyr eyle / Dırāz itme sözi kūtehdür elbet cübbe vü binīşden

Piyāveş olma pā-māl esb-i nāza hem-çü ferzāne / Otur ḫāneñde temkīn ile şāhum ḳaçma bir kīşden

Iṣırmışlar leb ü ruḫsār-ı yāri ṣorma ey zāhid / Dükān-ı sin-keşān pes bellüdür āvīze-i dişden

Hevā-yı hecr ile dil-germ iken durmaz yine gerdūn / Düşürdi yaz iken yāre bürūdet bu degül ḳışdan

Ḫalāṣ olmaz zebān-ı ḫāme ḳayd-ı lā’ubālīden / Öper ‘ayyāş-meşreb cām ber-leb bellü gelişden

Perīşān söyledür tāb u teb-i hicrān-ı cānāna / Daḫı kilk-i hüner āvāre Ḫāliṣ ḳalmasun işden