Ṣubḥ dem aldı cemālından güneş ṭurfa niḳāb / Nūra döndi yeryüzi açıldı ẓulmāt-ı ḥicāb / On sekiz miñ ʿāleme raḥmetden oldı fetḥ-i bāb / Bu nidānı ʿarş-ı aʿlādan yetürdi āfitāb / Yā ʿAlḭ yā İlyā yā Bu’l-Ḥasan yā Būturāb

Ẕerre-yi nūr-ı ʿAlḭdür aṣl-ı icād-ı melek / Vaḥş-ı ṭayr u cinn u insān bünyād-ı melek / Bu cehetdendür ki Ādem oldı üstād-ı melek / Uşbu esmādur felek üstünde evrād-ı melek / Yā ʿAlḭ yā İlyā yā Bu’l-Ḥasan yā Būturāb

Érdi bu luṭf-ı ezel iḥsān-ı ḥālıḳdan bize / Mihr-i āl-i Ḥaydar-ı kerrār ḫālıḳdan bize / Keşf-i remz oldı kelāmullah-ı nāṭıḳdan bize / Bu beyān el vérdi esrār-ı ḥaḳāyıḳdan bize / Yā ʿAlḭ yā İlyā yā Bu’l-Ḥasan yā Būturāb

Maʿnḭ-yi naṣr-ı minallah maʿnḭ-yi fetḥ-i ḳarḭb / Fetḥ-i nuṣret gösterür aḥbaba dḭdār-ı ḥabḭb / Kūri-i aġyār-ı cāhil kūri-i div-i raḳḭb / Ṣubḥ-dem gülşende oḫurdı ḫaṭib ʿandelḭb / Yā ʿAlḭ yā İlyā yā Bu’l-Ḥasan yā Būturāb

Dest-i feyyāż-ı güher-bār ḳasḭm-i nār u nūr / Nuṭḳ-ı cān-baḥş dem-i rūḥu’l emḭn nefḫ-i ṣūr / Reşḥ cām-ı kevŝer şḭr u şarābe’z-ẓuhūr / Muttaṣıl bu fikri cennetde ḳılur ġılmān u ḥūr / Yā ʿAlḭ yā İlyā yā Bu’l-Ḥasan yā Būturāb

ʿAşḳ-ı şāh-ı evliyādır kün-fekānıñ ḥāṣılı / ʿAşḳ-ilen anı sevenler oldı Ḥaḳḳıñ vāṣılı / Bu cehetden kim ʿAlḭdir ḥall-iden her müşkili / Söyledi bu medḥi şānında anıñ ḳudret dili / Yā ʿAlḭ yā İlyā yā Bu’l-Ḥasan yā Būturāb

Dünyāda her kim bendeyi ol ḫāceye iḳrār éder / ʿUḳbada ol ʿāşıḳ-ı maḥrem-i Ḥaḳḳ esrar éder / ʿĀlim-i ʿilm-i Allahı vāḳıf-ı esrār éder / Kim ki nāṭıḳdır bu fikri dem-be-dem tekrār éder / Yā ʿAlḭ yā İlyā yā Bu’l-Ḥasan yā Būturāb

Ḥubb-ı evlād-ı ʿAlḭ rūḥ-ı revānımdur menim / Māni-yi ḭmānʿaşḳ u ʿaḳl u cānımdur menim / Dāniş-i idrāk ʿilm-i cāvidānımdur menim / Dāimā evṣāf-ı dilde dāsıtānımdur menim / Yā ʿAlḭ yā İlyā yā Bu’l-Ḥasan yā Būturāb

Cām-ı ʿaşḳıñ curʿasından nūş-ı ʿaşḳ ol mest-i Ḥaḳḳ / ʿĀlem-i vaḥdetde oldı tā ebed peyvest-i Ḥaḳḳ / Nuṭḳ-ı pākiñ maʿnḭde Ḥaḳḳ nuṭḳ-ı destiñ dest-i Ḥaḳḳ / Bḭ-gümān u bḭ-ḫaṭā lā raybe lā şek mest-i Ḥaḳḳ / Yā ʿAlḭ yā İlyā yā Bu’l-Ḥasan yā Būturāb

Himmetḭdir bende-yi evlād-ı Ḥaydar ʿaşḳ-ilen / Mindi himmet atını bu yolda ḳaṭar ʿaşḳ-ilen / Olsa her kim bile meddāḥ-ı suḫanver ʿaşḳ-ilen / Baġlar velāyet nāmını mükerrer ʿaşḳ-ilen / Yā ʿAlḭ yā İlyā yā Bu’l-Ḥasan yā Būturāb