Taʿallül ḳılma sāḳi mey getür bir dem ki fırṣatdur / Teġāfül urma söyle muṭrıba fırṣat ġanḭmetdür

Ḥayātıñ naḳdini ṣarf étme kim bu ḫāb-ı ġafletdür / Ḥaḳḳıñ dḭdārıñı görmez olar kim ehl-i ġafletdür

Beli dḭdār-ı maʿnḭ devlet-i dḭdāra oġraşdı / Neden kim ẓāhir u bāṭında ol ṣāḥib-i baṣḭretdür

Mücellādur anıñ āyinesi nūr-ı velāyetden / Żiyā-yı dḭde-i maʿnḭ ṣafā-yı şemʿ-i ṣūretdür

ʿAlḭdür menbaʿ-ı nūr-ı velāyet nūr-ı ʿarşullah / Melekler farḳına pāy-ı turābı tāc-ı devletdür

Muallaḳ dönderen dolaba nisbet çenber-i çarḫı / Ḥaḳḭḳatde eyā müʾminiñ ʿAlḭ ol dest-i ḳudretdür

Otuz miñ üç yüz yıl Ādemden öñden baġlıyan dḭvi / ʿAlḭdür bu yeddi yaşdan açan bu ʿayn-ı ḥikmetdür

ʿAdū girmez elif tek ey muvaḥḥid ẕātına Ḥaḳḳıñ / Vücūd-ı ferd onıñ gevher-i deryā-yı vaḥdetdür

Sücūd eyle vücūd-ı pākine gel bir taḳarrub bul / Bu emr dutmıyan ḫāsir sezā-yı ṭūḳ-ı laʿnetdür

Gel ey ferzend-i Ādem yu yüzinden gerd-i ʿiṣyānı / ʿAlḭniñ āb-ı nuṭḳ-ilen yolu deryā-yı raḥmetdür

ʿAlḭden iste imdād u ḫarāb ét ḫayber-i nefsi / Şehādet barmaġı şāhıñ kilid-i bāb-ı nuṣretdür

ʿAlḭ yolında ḳılmışdı yekün cān u cihān terkḭn / Gedādur Himmetḭ amma gedā-yı ʿāl-i himmetdür