Geh olur muḳbile sermāye-i ‘izzet şerbet / Gāh müdebbirlere cān-gāh-ı veḳāḥat şerbet

Laḥẓa hem-bezm-i mey-i ülfet iken meclisde / Geh olur dāfi‘a-ı sıḳlete ālet şerbet

Henūz āġūş-ı müsemmāda iken virmişdür / Leb-i ümniyye-i ‘uşşāḳa leṭāfet şerbet

Daḫı bir şīr ü şeker-ḫūrde o mīrān henūz / İdemez ‘āşıḳına def’-i ḥarāret şerbet

Dāye-dār olmak içün şerbet-i la‘l ile müdām / Kāse-i dilde çeker ḫayli eẕiyyet şerbet

Çāşnī-baḫş-ı ḥayāt olmadadur la‘l-i teri / Gül-i la‘linden ider kesb-i ḥalāvet şerbet

Ṭaşt-ı endīşede şüst ideli gül pīrehenüñ / Rūy-ı mīnāya döñer reng-i ḥacālet şerbet

Naġam-ı ḥurmet-i ḳulḳul girilür gūşa deyü / Ḳapamış penbe ile gūşını elbet şerbet

Gördi ḳārūresini vesveseden dūr oldı / Eyledi ref‘-i raḳīb ile ṭabābet şerbet

Çekse yek-ḳaṭresin inbīk-i nevāzişden o şūḫ / Reng-i la‘linden ider gül gibi neş’et şerbet

Leb-i gül māye ile perçem-i eftīmūnı / Virdi sevdā-zede kān-ı dile ḥikmet şerbet

Naḳş-ı būs ile ruḫ u gerden-i reng-ā-renge / Virdi bir neşve fem-i la‘l-i nezāket şerbet

Mā-ḥaṣal mīrüm olup manṣıb-ı muḫliṣle be-kām / Mevsim-i tehniye Ḫāliṣ olur ‘ādet şerbet