Sāḳḭ-yi kevŝer elinden içmişem bir dolu cām / Fāriġ-i āzād olur endḭşe-yi mest müdām

Ol ḳademden cām-ı cem mirāt-ı İskender kimi / Rūşen oldı bendeye keyfiyyet-i eşyā tamām

Ḳalmadı ẓulmāt-ı şirk teng-i cihānda mihr-ile / Doġdı tā burc-ı velāyetden ḳamer gitti ḥamām

Açdı raḥmet bābını ol bāb-ı şehr-i ʿilm-i dḭn / Ḥaḳḳ yola doġrı hidāyet buldı andan ḥāṣ u ʿām

Remz-ilen yeddi kitābıñ aṣlını her noḳtadan / Ḳıldı ʿayn u lām yā ʿāriflere fi ḍād u lām

Cennet u ġılmān u ḥūr bāde-yi kevŝer ḥalāl / Oldı aḥbābına onıñ āteş-i dūzaḫ ḥarām

Āstān eyle kūy-ı kaʿbeyi taḥḳḭḳ ehline / Secde eyler aña insān u melāik ṣubḥ u şām

Ehl-i ʿaşḳa anı sevmekdir ṣalāt-ı dāimun / Uşbudur müʾminlere ʿayn-ı ʿibādet ve’s-selām

Var ise nuṭḳuñ kelāmullah-ı nāṭıḳ şerhin ét / Bu cihetden kim anıñ evṣāfıdur ḫayru’l-kelām

Ḥaydarı medḥ eylemekdir ʿayn-ı farż farż-ı ʿayn / Çünki medheyler onı Ḳur’ānda “ḥatta lā-yenām”

Baş götürme ḫāk-i dergāhından ol Ḥaydarıñ / Ola tā kim rūḥuña aʿlā u ʿilliyyḭn maḳām

Himmetḭ Ḥaḳḳdan evvel ʿAlḭdür āḫır mehdḭdir / On sekkiz miñ ʿāleme üstād rehber Ḥaḳḳ imām