Ṣaḳın aġyārı çekme ehl-i ʿaşḳa ḳarşu tenhāya / Teşekkī itmesünler ey ṣanem senden Mesiḥāya / Teraḥḥum eyle kim İncil-i ḥanı vir sevdāya / Teşekkī itmesünler ey ṣanem senden Mesiḥāya

İderseñ ser-fürū idenleri heb ġamla perverde / Fiġān u nālesi ʿāşıklarıñ ṣanma ḳalur yerde / Żiyā-yı dīn-i ḥüsne küfr-i zülfüñ eyleme perde / Teşekkī itmesünler ey ṣanem senden Mesiḥāya

Gül-āb-ı vaṣlıñı ṣaç luṭf idüb bu cism-i ṣad çāke / Dirīġ itme naẓar naḳş u nigār-ı ḳalb-i ġamnāke / Ġamıñla āh u feryādım ʿurūc itdikce eflāke / Teşekkī itmesünler ey ṣanem senden Mesiḥāya

Künişt-i ḫ˅âhiş-i vaṣlıñda yoġsa berhemen cānā / Cihāndır bulunur elbet kitāb-ı vuṣlata dānā / Uzatma daʿvī-i nāz u niyāzı böyle pervā / Teşekkī itmesünler ey ṣanem senden Mesiḥāya

Kerem ḳıl itme cevri Nūrī-i zāre cefākārım / Ṣaḳın rūy-ı sipihri ṭutmasun dūd-ı şerer bārım / Bülend olduḳca her dem bāng-i āh u nāle vü zārum / Teşekkī itmesünler ey ṣanem senden Mesiḥāya