Çekdi maşrıḳdan livā-yı Aḥmed sulṭān ṣubḥ / Ṭalʿatından nūra döndi ser-be-ser meydān ṣubḥ

Münhezim oldı deminden her ṭaraf Çḭn u Ḥabeş / Kesdi ḫayl-i Zeng-bārıñ başını ṣamṣām ṣubḥ

Ḳayretinden leşkerin yandurdı İskender miŝāl / Ṣalmadı çün āyine pertev-i meşʿal-i tābān ṣubḥ

Pḭçin-i zencḭr-i zerrḭn ile miŝl-i ejdehā / Çāh-ı ẓulmetden çıḫardı Rüstem-i destān ṣubḥ

Künbed-i devvār şol fānus gerdān ile gör / Ḳıldı envār-ı münevver şemʿ-i nūr-efşān ṣubḥ

Asdı bir ḳandil-i zer ṭāḳ-ı felekden dest-i ġayb / Şuʿlesinden zer-nigār oldı onuñ eyvān ṣubḥ

Açdı yüzinden niḳābıñ eyledi ʿarż-ı cemāl / Fırḳa-yı ḳaṣr-ı felekden luʿbet-i pinhān ṣubḥ

Oldı şāh-ı muhteşem mıṣr-ı nübüvvet taḫtına / Çıḫdı ṣubḥ-ı maġribden Yūsuf-ı Kenʿān ṣubḥ

Nuṭḳa geldi şāh-ı meydān-ile hengām-ı seḥer / Āteş-i Muʿsā kimiñ şol kevkeb-i raḫşān ṣubḥ

Ḳıldılar kevkebleri naḳl-i ceres Ḫurşid-i cām / Şāh bezminden ṣabūḥi ḳılmaḳa mestān ṣubḥ

Tapdılar andan ṭemettuʿ vaḥş u ṭayr u ins u cḭnn / Maṭbaḫ-ı ḫān-ı velāyetden çekildi ḫān ṣubḥ

Himmetḭ bir laḥẓa ḫāmūş olma ḳıl ahengi medḥ / ʿArş gülẕārında sensin bülbül-i ḫoş-ḫān ṣubḥ