Tanı ol şāhı kim anıñ baḥr-ı ber ḥükmindedür / Maşrıḳeyn maġribeyn u ḫuşk u ter ḥükmindedür

Sāl u māh u hafta u eyyām u sāʿat u dem-be-dem / Nūr-ı ẓulmet ḥikmet u şām u seḥer ḥükmindedür

On iki burc doḳḳuz eyvān yeddi pāsbān / İki meşʿal yaʿni ki ḫurşḭd u ḳamer ḥükmindedür

Murtażādur şeh-süvār-ı ʿarṣā-yı meydān-ı ʿaşḳ / Ḍarb-ı çevgān u ḳażā-yı gūy ḳader ḥükmindedür

Zer-feşān u tāc-baḫş u nūr-pāş / Şāh-ı encüm ḫüsrev-i zerrḭn-siper ḥükmindedür

Bir işāret ḳıldı yetmiş iki ārşun çekdi kad / Luṭf-ı Ḥaḳḳdan ẕülfiḳār-ı nām-ver ḥükmindedür

ʿĀlem-i maʿnḭde oldur cān véren hem cān alan / Ṣūret-i mevt u ḥayāt u ḫayr u şer ḥükmindedür

Ḳaḍı-yı bāz u kebūter müftḭ-yi ejderdür ol / Leşker-i naḥle ejdehā-yı heft-ser ḥükmindedür

Oldur leşker-keş u ervāḥ-ı ḫayl-i enbiyā / Ḥūr ġılmān u melek cinn u beşer ḥükmindedür

Ṣūr-ı İsrāfḭl u ḥaşr u neşr u mḭzān-ı ṣırāṭ / Ravżā-yı rıḍvān u nḭrān-ı saḳar ḥükmindedür

Her ne kim ḫalḳ étdi ḫallāḳ-ı vücūd-ı kāināt / Ol şehen-şāh-ı kadḭmiñ ser-be-ser ḥükmindedür

Himmetḭ bir şehriyārıñ āsıtānı kelbidür / Kim anıñ bebr u peleng u şḭr-i ner hükmindedür