Tehâlüf kevne evzâʿ-ı perîşan nâ-becâdır hep / Serâpâ olsa da ihsân ehibbâya cefâdır hep

Hüner her âdemin ahlâkını idrâktir yoksa / Tabîat hükmüne karşı taarruz nâ-sezâdır hep

İlâ-gayrü’n-nihâye nokta taksîm etse de yârân / Bu efkâr emr-i cismiyyette zihnîdir hebâdır hep

Tabiî ömr ile mahlûktur maʿdûm olur âlem / Nihâyet cümle mahlûkatın ahvâli fenâdır hep

Abes sanma cihânı hâzır ol bezm-i mükâfâta / Abes zanneylemek tekvîn-i Hallâkı hatâdır hep

Eder her şahsı Hak rûhundan ilhâmât ile âgâh / Bu yolda vâdî-i inkâra gitmek nâ-revâdır hep

Bilinmez akl ile maksûd-ı Hâlik emr-i hilkatten / Peyemberler tarîk-ı ihtidâda reh-nümâdır hep

Belâ-yı mahz ise kıl ayn-ı rahmet mevti dünyâda / Hayâtın gördüğü zevk u safâ derd ü belâdır hep

Cihânda arz-ı ilm etmez hakîme kesret-i âdât / Bu endîşe hesâb-ı kudret-i Rabb-ı Hudâdır hep

Mekân-ı kâinâta dâimâ mahsûs olur ibʿad / Vücûd-ı mâsivânın hârici sırr-ı hafâdır hep

Beşer ikbâl ile efʿâle Gâlib olsa da ekser / Hakîkatte yine cârî olan hükm-i kazâdır hep