Olunca râyet-efrâz-ı melâmet dâver-i ihlâs / Olur âlem serâser pâymâl-i leşker-i ihlâs

Hoşâ dârü’l-cihâd-ı aşk kim mansûr olur anda / Livâü'’l-hamd-ı himmet Zülfikâr-ı Hayder-i ihlâs

Hoşâ dârü’s-selâm-ı aşk kim yeksân olur anda / Sevâd-ı âlem-i ıtlâk deşt-i kişver-i ihlâs

Mey-i vahdetle dil kim mest olup nefy-i sıfât eyler / Eder isbât-ı feyz-i neşʾe-i cân-perver-i ihlâs

Zamîrim ol harîm-i Kâbe-i vahy ü Hüdâdır kim / Eder Cibrîl künc-i mahfelinde ezber-i ihlâs

Dil-i kudsî-nihâdım kutb-ı evc-i âlem-i rahmet / Süveydâ-yı derûnum âfitâb-ı hâver-i ihlâs

Sevâd-ı himmetimden rû-nümâdır arş-ı istiğnâ / Çerâğ-ı fıtratimden rûşenâdır cevher-i ihlâs

O kurbân-ı gam-ı aşkım ki görse himmetim Cibrîl / Ederdi reh-güzâr-ı câna ferş-i şeh-per-i ihlâs

N’ola feyz-âver-i ıtlâk olursa mülk-i dil Gâlib / Olur müstağnî-i eşkâl ü eşyâ kişver-i ihlâs

Cenâb-ı Mîr-i Nâmık ol sühan-perdâz-ı hikmet kim / Olur her gevher-i nazm-ı lâtîfi zîver-i ihlâs

Yegâne şâh-ı mülk-i mârifettir tabʿına şimdi / Sezâ takdîr ederse arz-ı taht ü efser-i ihlâs