Çıkınca taht-ı tecrîde şeh-i dîvân-ı istiğnâ / Tutar tâ âlem-i lâhûtu izz ü şân-ı istiğnâ

Zemîni cilvegâh-ı kudsiyân-ı arş-ı âlâdır / O rütbe mürtefiʿdir sâha-i eyvân-ı istiğnâ

Girân-cânân-ı câha yer bulunmaz deşt-i himmette / Sebük-bârâna cevlângâhtır meydân-ı istiğnâ

Mesîh olsan olur bir sûzenin tâ mâniʿ-i rifʿat / Götürmez zerre siklet keffe-i mîzân-ı istiğnâ

Tenezzül eylemez Edhem gibi taht-ı Süleymâna / Hakâyıkdân-ı izz ü şevket-i unvân-ı istiğnâ

Aceb mi fakr ile attâr-ı bendergâh-ı feyz olsam / Metâʿı terk ile revnak bulur dükkân-ı istiğnâ

N’ola pinhân ise dil hırka-i fakr u melâmette / Olur pûşîde-i beytü’l-harem dâmân-ı istiğnâ

Cihânı tutsa tûfân-ı havâdis tîre-nâk olmaz / Küdûretten berîdir meşreb-i rindân-ı istiğnâ

N’ola mâmûr ise feyz ile Gâlib arş-ı âzamdan / Dilimdir tahtgâh-ı Husrev-i zî-şân-ı istiğnâ