Bâğ-ı işret Tûr-ı Sînâdır şeb-i mehtâbda / Câm-ı mey berk-ı tecellâdır şeb-i mehtâbda

Âlemi mebhût eder iʿcâz-ı feyz-i câm ile / Dest-i sâkî dest-i Mûsâ'dır şeb-i mehtâbda

Mihr-i hüsn-i Yûsuf eyler heyʾetinden iltimâʿ / Nahl-i gül ayn-ı Züleyhâdır şeb-i mehtâbda

Aks-i gülden berk urur eşkinde feyz-i câvidân / Çeşm-i bülbül câm-ı sahbâdır şeb-i mehtâbda

Cilvegâh eyler leb-i deryâyı her hûr-cemâl / Serv-i sîmîn nahl-i Tûbâdır şeb-i mehtâbda

Sûret-i mihr-i cemâl-i yâri eyler âşikâr / Dehr mirʾât-i mücellâdır şeb-i mehtâbda

Âsumâna nâz eder feyz-i letâfetden zemîn / Her gülü bir necm-i garrâdır şeb-i mehtâbda

Aks-i müjgânım değil sünbülde Rıdvân-ı behişt / Şâne-gîr-i zülf-i havrâdır şeb-i mehtâbda

Nergisi seyr eyle Gâlib iktibâs-ı nûr ile / Gülşene çeşm-i temâşâdır şeb-i mehtâbda