Tenim pür dâğdır yekser dil-i âgâh nâ-peydâ / Cihân bâğ-ı selâm olmuş Halîlullah nâ-peydâ

Aceb bir mahşer-âşubdur bismilgeh-i cânân / Şefâat râygân olmuş şefâat-hâh nâ-peydâ

Ben ol mest-i mey-i hum-hâne-i gayb ü şühûdum kim / Olur çeşmimde âlem gâh peydâ gâh nâ-peydâ

Aceb bir deşt-i hayrette hadeng-endâz-ı aşkım kim / Nişân gümgeşte şast işkeste tîr-i âh nâ-peydâ

Aceb bir çeşme-cûy-i zulmet-âbâd-ı murâdım kim / Hezâran Hızr u İskender nümâyan râh nâ-peydâ

O kutb-ı merkez-i yeʾsim ki dönse tâliim nâ-gâh / Olur devr-i felek ber-aks ü sâl ü mâh nâ-peydâ

Süleymân-ı serîr-i himmetiz bir yerde kim Gâlib / Olur şâh ü gedâ yeksân ü mâl ü câh nâ-peydâ