Müncelî oldukça Tûr-ı sîneden dîdâr-ı feyz / Şûlezâr-ı hayret eyler âlemi envâr-ı feyz

Berk-ı hüsnün kim olur seylâbe-rîz-ı bâğ-ı nâz / Bin gül-i hurşîd açar her nahle-i gülzâr-ı feyz

Mihr-i rûyin kim olur pertev-fürûz-ı mülk-i cân / Gösterir her zerresi bir âlem-i envâr-ı feyz

Rind-i aşkım meclis-i ikbâlime âşüftedir / Câm-ı serşâr-ı safâ sâkî-i gül-ruhsâr-ı feyz

Nev-bahâr-ı aşkım ebr-i âhıma vâbestedir / Rahşiş-i berk-ı tecellâ cûşiş-i enhâr-ı feyz

Eşkimin her mevc-i tûfan-bârı bir deryâ-yı aşk / Sînemin her dâğ-ı âteş-nâki bir kûhsâr-ı feyz

Mazhar-ı esrâr-ı Kerrârım değil haytu’ş-şuâ / El verip gökten bana hurşîd eder ikrâr-ı feyz

Her sözümden âyet-i isteftehû eyler zuhûr / Tabʿ-ı âlî-himmetimdir maşrık-ı âsâr-ı feyz

Devre-i aşk ile Gâlib kutb-ı evc-i himmetim / Nokta-i dâğ-ı dilimdir merkez-i pergâr-ı feyz