Anılsın ol belâ ahdi ki mey nûş etdiğim demdir / Gam-ı dünyâ vü ukbâyı ferâmûş etdiğim demdir

Anılsın ol zamân-ı şûriş-âbâd-ı ene’l-hak kim / Dili keyf-i mey-i vahdetle bî-hûş etdiğim demdir

Anılsın ol şeb-i miʿrâc-ı vuslat kim safâsından / Leb-i nâz ü niyâzı lâl ü hâmûş etdiğim demdir

Zihî derd-i alâyık-sûz-ı mihr-i âlem-i vahdet / Ki imkân ü vücûbu dûş ber-dûş etdiğim demdir

Zihî hengâme-i nâz ü hitâb-ı len terânî kim / Serâpâ gönlümü Mûsâ gibi gûş etdiğim demdir

Kanı ol devr-i bezm-i güft-gûy-i sırr-ı lâ-yüs’el / Ki akl-ı evveli bir sözle medhûş etdiğim demdir

Zamân-ı girye-i can-sûzumu yâd eyle ey Gâlib / Hevâ-yı aşk ile tûfan gibi cûş etdiğim demdir