Sunsa el hançere ol âfet-i devrân-ı hayât / Bir olur çâk-i girîbân ile dâmân-ı hayât

Neşve-i tîg ile uşşâka verip feyz-i ebed / Eyleme reşk ile Îsâyı peşîmân-ı hayât

Merhem-i zahm-ı dilim rîze-i elmâs ile / Gevher-i feyz ile lebrîz ola hemyân-ı hayât

Ağlasın haşre kadar dîde-i Yâkub-ı ümîd / Düştü çâh-ı ademe Yûsuf-ı Kenʿân-ı hayât

Dem-i şemşîr ile zahm-ı dili sîrâb eyle / Tâzelensin gül-i sad-berg-i gülistân-ı hayât

Feyz-yâb-ı dem-i güftârıyım ol şûhun kim / Cân bulur neşve-i laʿliyle şehîdân-ı hayât

Nass-ı hattı mey-i laʿl-i lebine verdi cevâz / Bârekallah zihî Sûre-i Rahmân-ı hayât

Gâlib ol Îsî-i muʿciz-nefes-i nazmım kim / Hallolur şiʿrim ile nükte-i pinhân-ı hayât