Hâne-zâd-ı derd-i aşkız sîne meskendir bize / Zahm ser-tâ-pâ sevâd-ı tende revzendir bize

Biz Kelîm-i Tûr-ı aşkız mazhar-ı nûr-ı cemâl / Her şerâr-ı dâğ-ı dil bir nâr-ı Eymendir bize

Biz Mesîh-i lâ-mekân-seyriz avâlimden cüdâ / Târ ü pûd-ı şûle-i hurşîd sûzendir bize

Vâkıf-ı feyz-i leb-i müşkîn-i Hıtânız tâ ezel / Âb-ı hayvân her sevâd-ı şebde rûşendir bize

Ârif-i râz-âşinâ-yı dahmegâh-ı hasretiz / Hande-i âlem serâpâ âh-ı şîvendir bize

Bir gül-i âteş-nesîmin şûlezârıdır gönül / Kim şuâ-ı mihr-i mahşer âb-ı gülşendir bize

Hırka-pûş-ı vahdetiz ol tekye-i hikmetde kim / Mevc-i deryâ-yı havâdis çîn-i dâmendir bize

Kârbân-sâlâr-ı nakd-i dânişiz ol yerde kim / Sûret-i âyîne-i idrâk reh-zendir bize

Ol kadar bî-hâsılız Gâlib bu vahşetzârda / Şûle-i çeşm-i gazâlân berk-ı hırmendir bize