Dile iklîm-i Cemdir gülşen-i meʾvâ-yı istiğnâ / Murassâ tâc-ı zerdir gonce-i zîbâ-yı istiğnâ

Hoşâ gülzâr-ı feyz-i aşk kim yek-reng olur onda / Gül-i hurşîd-i mahşer lâle-i sahrâ-yı istiğnâ

Hoşâ bezm-i cünûn kim rûşenâdır tâb-ı şemʿinden / Çerâğ-ı akl-ı evvel cevher-i mînâ-yı istiğnâ

Ben ol Cemşîd-i feyzim kim safâ-yı bezmime hayrân / Dem-i nutk-ı Mesîhâ neşʾe-i sahbâ-yı istiğnâ

Ben ol Keyhusrev-i mihr-efser-i fakrım ki fahr eyler / Şükûh ü şevketimle âlem-i bâlâ-yı istiğnâ

N’ola el sunmasam gül-gonce-i Tûr-ı tecellâya / Ayândır âstînimden yed-i beyzâ-yı istiğnâ

Hüveydâdır sevâd-ı himmetimde Kâbe-i maksûd / Nümâyandır dilimde Yesrib ü Bathâ-yı istiğnâ

Tavâfında olur ihrâm-bend-i iftihâr ervâh / Mukaddestir o rütbe Kâbe-i ulyâ-yı istiğnâ

O gümnâmım ki ey Gâlib bana sahrâ-yı merg olmuş / Sevâd-ı künc-i uzlet sâye-i anka-yı istiğnâ