Zerreler sîretde mihr-i âlem-ârâdır bize / Vâkıf-ı mâhiyyetiz her katre deryâdır bize

Mazhar-ı feyz-i tecellâdır serâpâ kâinat / Âlemin her zerresi bir Tûr-ı Sînâ'dır bize

Biz Kelîm-i Tûr-ı aşkız mahv-ı envâr-ı cemâl / Şâhid ü meşhûd olan mihr-i tecellâdır bize

Neşʾe-pîrâ-yı hayâtız nefha-i tekrîmden / Bî-tekellüf her nefes iʿcâz-ı Îsâ'dır bize

Müncelîdir sırrımızdan pertev-i hüsn-i kadîm / Aşk-ı sûret-nefh-i Rahmânî heyûlâdır bize

Fâriğiz havf u ricâ-yı dûzah u cennâtdan / Derd-i dil sermâye-i dünyâ vü ukbâdır bize

Müttehiddir âlem-i vahdetde hükm-i küfr ü dîn / Lâ vü illâ şîve-i âsâr-ı esmâdır bize

Secde-ârâyız makâm-ı semme vechullâhda / Âlemin her cânibi beyt-i muallâdır bize

Seyr-i Miʿrâc eyleriz feyz-i salât ile müdâm / Her şeb-i târîk Gâlib şâm-ı İsrâ'dır bize