Haremgâh-ı bekâbillâhta hükm-i fenâ yoktur / Kadem mülkünde hadd-i ibtidâ vü intihâ yoktur

Ezel yektâ idi sanman Hudâ el-ân kemâ-kândır / Hakîkat-âşinâyân-ı vücûda mâsivâ yoktur

Hatâdır akl ile dâvâ-yı derk-i hikmet-i âlem / Hudânın yoksa ef’âlinde ey gâfil hatâ yoktur

Serâpâ müntemîdir hikmet-i Bârîye mahlûkât / Gülistân-ı cihânda bir giyâh-ı nâ-becâ yoktur

Mürekkebdir mevâdd-ı yeʾs ü gamdan serteser dünyâ / Zamîr-i tıynet-i âlemde eczâ-yı safâ yoktur

Rızâ acz ü garezdir menfaat vermez hakîkatte / Rızâya mezheb-i erbâb-ı himmette rızâ yoktur

Varan aksâ-yı hüsn-i iʿtikâda inhirâf etmez / Temâşâ kıl hatt-ı mihverde Gâlib inhinâ yoktur