Dile âteş-zen-i hicrân olan sevdâ-yı dîgerdir / Bizi Mecnûn-ı deşt-i aşk eden Leylâ-yı dîgerdir

Hazer âşûb-ı kadd-i yârden ey arsa-i âlem / Ki sahrâ-yı kıyâmet tâlib-i sahrâ-yı dîgerdir

Abes zühhâd ile sahrâ-rev-i Beytü’l-harem olmak / Matâf-ı ehl-i himmet Kâbe-i ulyâ-yı dîgerdir

Değildir münfail âb ü hevâdan sûret-i tabʿım / Heyûlâ-yı vücûdum cevher-i vâlâ-yı dîgerdir

Celâl ile cemâl olmaz müessir kalb-i uşşâka / Cihân-ı aşkta faʿâl olan esmâ-yı dîgerdir

N’ola ahkâm-ı fenn-i mantıkı nesh etse âsârım / Kazâyâ-yı mahabbet âşıka dâvâ-yı dîgerdir

Olur herbir kelâmı zîb-i gûş-i Âdem ü Havvâ / Gönül remz-âşinâ-yı alleme’l-esmâ-yı dîgerdir

Harîf-i bezm-i aşk olmaz mey-i kevserle şîrin-kâm / Dil-i mahmûr-ı Gâlib neşʾe-i sahbâ-yı dîgerdir