Olmasın mı derd-i dilden cân-ı şeydâ muztarib / Lerzişimden unsur-ı âlem serâpâ muztarib

Öyle meʾyûsum ki kılmaz haşre dek sûret kabûl / Olsa ger bir zerre yeʾsimle heyûlâ muztarib

Derd-i hicriyle o giryân-ı belâyım kim olur / Düşse katre eşk-i çeşmim heft deryâ muztarib

Hâkim ammâ lerze-nâk-i hayretim tâ şöyle kim / Iztırâbımdan olur arş-ı muallâ muztarib

Bezm-i yeʾsimden dil-i âmâl-i âlem bî-huzûr / Dest-i hayret-perverimden câm-ı sahbâ muztarib

Âlem-i ulvîye arz et kabz-ı tîg-ı gamzesin / Tâ hayâtından ola Hızr u Mesîhâ muztarib

Fâriğ-ı havf u ricâyım Gâlib ammâ kim yine / Iztırâb etsem olur dünyâ vü ukbâ muztarib