Şûle-i hasret gelir dâğ-ı serimden reng reng / Müncelîdir cevher-i aşk efserimden reng reng

Merdüm-i çeşm-i Kelîm'im mâlik-i iʿcâz-ı aşk / Berk urur nûr-ı tecellî manzarımdan reng reng

Dûzah-ı isyânım ammâ mazhar-ı nûr-ı cemâl / Şûle-i rahmet gelir her ahkerimden reng reng

Ben o subh-ı âsumân-ı kün fekânım kim olur / Bâğ-ı îcâd âfitâb-ı hâverimden reng reng

Şemʿ-i rûy-i yâre yandıkça dil-i pervâne-aşk / Bin gül-i hurşîd açar hâkisterimden reng reng

Hâne-i dilden gelir her subh âh-ı âteşîn / Rûşenâdır dûd-ı hasret micmerimden reng reng

Gâlib ol sûret-ger-i hüsn-i beyânım kim çıkar / Nakş-ı Mani hâme-i feyz-âverimden reng reng