Olunca nesr-i dil gerdûnda cevlânger-i tecrîd / Olur âvâz-ı şehbâli Mesîhe rehber-i tecrîd

Hoşâ firdevs-i himmet kim verir her sâgar-ı bezmi / Safâ-yı saky-i Hayder feyz-i mevc-i kevser-i tecrîd

Hoşâ mülk-i cünûn kim rûşenâdır her sevâdından / Çerâğ-ı akl-ı evvel âfitâb-ı mahşer-i tecrîd

Ben ol Cemşîd-i seyr-i gülşen-i fakr ü ferâğım kim / Olur her lâle dest-i himmette efser-i tecrîd

Ben ol sermest-i hâb-âlûde-i subh-ı zuhûrum kim / Gül-i hurşîd-i mahşerdir elimde sâgar-ı tecrîd

Gönül lebbeyk-gûdur ol Halîl-i hüsne kim olmuş / Tavâf-ı dergehi ervâha hacc-ı ekber-i tecrîd

Aceb mi muktedâ-yı mihnet ü ekdâr ise tabʿım / Olur fakr ü melâmet ümmet-i peygamber-i tecrîd

O Hayder-himmetim kim tîg-ı azmimle bulur nusret / Cihâd-ı fakr ü istiğnâ gazâ-yı ekber-i tecrîd

Sipihre her şerâr-ı dâğ-ı sînem mihr-i âlem-sûz / Mesîhe her şuâ-ı dûd-ı âhım hemser-i tecrîd

Ben ol pervâne-i dil-sûz-ı şemʿ-i bezm-i aşkım kim / Gubâr-ı unsurumdan tûde-i hâkister-i tecrîd

Aceb mi câme-i devletten iʿrâz eylese tabʿım / Abâ-yı fakr olur Gâlib kabâ-yı Hayder-i tecrîd