Adâlettir medâr-ı intizâm-ı âlem-i Tevfîk / Mezâlimden olur lerzende arş-ı âzam-ı Tevfîk

Hoşâ ikbâl-i âlem-gîr-i şerʿî kim safâsından / Olur dünyâ vü mâfîhâ serâser hurrem-i tevfîk

Hoşâ etvâr-ı adl ü dâd-ı Fârûkî ki feyzinden / Olur teʾyîd-i Bârî her sadedde munzam-ı tevfîk

O kim hurşîd-i hükmün şûle-pâş-ı bâğ-ı adl eyler / Olur meczûb her târ-ı şuâı şebnem-i tevfîk

O kim endîşe-i ıslâh-ı mülk eyler zamânında / Eder şükrâne hep varın nisâr-ı makdem-i Tevfîk

Figân ol fikr-i nâ-hemvâr-ı zâlimden ki zulmüyle / Kalır tâ haşre dek ser-beste-râz-ı mübhem-i tevfîk

Figân ol reʾy-i nâ-maʿkûl-i bâtıldan ki kahrıyle / Eder dünyâ serâpâ kûşe kûşe mâtem-i tevfîk

Eden sevk-ı matâyâ âlem-i ihlâsı teshîre / Olur râyet-keş-i ikbâl ü bahtı Rüstem-i tevfîk

Eden fikr-i rızâullâh olur her şâhid-i reʾyi / Meh-i Kenʿan gibi sultân-ı âlem hem-dem-i tevfîk

Esîr-i aşkıyım ol şâhid-i reʾyin ki rûyinde / Perîşândır serâpâ turra-i ham-der-ham-ı tevfîk

Ne dem ikbâl-i seyr-i arş-ı maʿnî eylesem Gâlib / Olur her şâhid-i fikr-i selîmim mahrem-i tevfîk