Dilim kim şevk-ı rûyinle esîr-i kâkül olmuşdur / Şuâ-ı dâğımın her lemʿası bir sünbül olmuşdur

Gönül âşüfte-i sevdâsıdır bir Leylî-i hüsnün / Ki târ-ı zülfünün dîvânesi akl-ı kül olmuşdur

N’ola sûzân olursa nâr-ı aşkınla dil-i bî-tâb / Nice bin hânedân ol şevk ile yanmış kül olmuşdur

İşitenler nevâ-yı nâlişim gülzâr-ı Tûr üzre / Sanırlar murg-ı bâğ-ı lenterânî bülbül olmuşdur

Aceb feyz-i eser var bâde-i can-bahş-ı laʿlinde / Hayâliyle vücûdum serteser ayn-ı mül olmuşdur

Kazâ dergâh-ı pîr-i tabʿıma gelmiş suâl eyler / Elinde sernigûn tâs-ı felek bir keçkül olmuşdur

Değil reng-i şafak Gâlib görünce mihr-i âsârım / Kararmış şerm ile rûyi sipihrin gül gül olmuşdur