Olup mersâ-yı hikmetden sefer-sâz-ı yemm-i mânâ / Açıldı keştî-i endîşe bismillâhi mecrâhâ

Teâlallah zihî keştî-i tûfan seyr-i maʿnî kim / Gelir herbir sütûnundan nidâya-yı vemâ evhâ

Teâlallah zihî keştî-i gerdun fülk-i maʿnî kim / Olur her bâdbânı sâyebân-ı âlem-i manā

Aceb bir nâhudâ-yı keştî-i bahr-ı kemâlim kim / Eder herbir hisâbım bir cihân-ı mârifet peydâ

Bulur azmimle nusret ictihâd-ı âlem-i tahkîk / Olur keşfimle zâhir gâyet-i mâhiyyet-i eşyâ

O muʿciz-gû hakîmim kim kalır bezmimde dembeste / Zebân-ı Feyzî-i dânâ lisân-ı Bû Alî Sînâ

Lisân-ı hikmetimden rûşenâdır sûret-i maʿni / Cihân-ı himmetimden rû-nümâdır kudret-i Mevlâ

O Cemşîd-i tarab-sâzım ki her câmımda zâhirdir / Safâ-yı devlet-i dünyâ beka-yı neşʾe-i ukbâ

O hallâk-ı mâânîyim ki her nutkumda muzmerdir / Meâl-i hikmetü’l-eşyâ kemâl-i alleme’l-esmâ

O hallâk-ı meânîyim ki vasf eyler cihan tabʿım / Zihî tabʿ-ı cihân-ârâ teâlā şânihü’l-aʿlâ

Edip miʿrâc-ı maʿnî Gâlibâ peygamber-i tabʿım / Erişti kurb-ı ev ednâya sübhânellezî esrâ