Sîne kim şûle-yâb-ı hicrindir / Sâha-i mâh-tâb-ı hicrindir

Âsumân-ı dilimde ey meh-i hüsn / Dâğlar âfitâb-ı hicrindir

Dîdede eşk ü dilde sûz-ı firâk / Mâye-i âb ü tâb-ı hicrindir

Zahm-ı hûn-geşte bâğ-ı sînemde / Gonce-i müşk-nâb-ı hicrindir

Levh-i sînem sevâd-ı mihnet ile / Bir mutavvel kitâb-ı hicrindir

Kân-ı sîmâb-ı hasret olmuştur / Sîne pür-ıztırâb-ı hicrindir

Devr-i hüsnünde bî-taab Gâlib / Sad-hased kâm-yâb-ı hicrindir