Âgûş-ı dilde görsem o hûrî-cemâlimi / Gıbta-nümâ-yı cennet ederdim hayâlimi

Kan ağladıkça hicr ile ben neşʾe-yâb olur / Mey mi sanır aceb o şûh eşk-i âlimi

Dûd-ı derûnu çarha hem-âgûş eylesem / Ol mâh-ı hüsne arz edemem iştiâlimi

Şûriş-fezâ-yı aşk olalı bir perî-izâr / İklîm-i dilde söyleyemem ihtilâlimi

Ruhsârı üzre ruʾyet-i zülfün ümîd edip / Fark edemem bu şevkıle rûz u leyâlimi

Sıktım nigâh-ı germile cânânı nerm iken / Ettim remîde hayf o vahşî gazâlimi

Gâlib bu feyz-i mihr ü muhabbetle çok mudur / Vakf-ı nuût-ı dilber edersem makâlimi

Olmaz nazîre hâmî-i üstâda gerçi kim / Eyler pesend cümle gazelde kemâlimi