Tecellî berk urur yer yer sevâd-ı dâğ-ı cânımdan / Cihân-ı Tûr-ı aşkım nûr akar her gülsitânımdan

Ben ol feyz-i bahâr-ı gülşen-i şühûdum kim / Şuâ-ı len terânî cûş eder bâd-ı vezânımdan

N’ola hem-feyz-i Îsâ olsa hâk-i bâğ-ı endîşem / Ser-â-pâ rûh olur sârî hevâ-yı dilsitânımdan

Safâ-yı cân ü dil bir şemmedir bûy-i nesîmimden / Hayât-ı câvidan bir reşhadır âb-ı revânımdan

Benim ol bülbül-i kudsî-safîr-i bâğ-ı fıtrat kim / Gelir pervâza murg-ı akl-ı evvel âşiyânımdan

Benim ol bâğbân-ı şûle-tohm u berk-ı hâsıl kim / Meh ü hurşîd iki kemter kedûdur bûstânımda

Alır kerrûbiyân bûy-i vefâ gül-nahl-i tabʿımdan / Olur rûhâniyan gülçîn-i ismet bâğ-ı cânımdan

Safâ-yı gülsitân-ı bâğ-ı tabʿım görse ger ervâh / Gelir bülbül gibi güftâra her serv-i çemânımdan

Ben ol vahy-âver-i nazmım ki sıyt-i şeh-per-i Cibrîl / Olur peydâ sarîr-i hâme-i muʿciz-beyânımdan

Ben ol esrâr-gûy-i nüsha-i ümmü’l-kitâbım kim / Çıkar tefsîr-i bismillâh her harf-i beyânımdan

Sevâd-ı meşrebim ol âlem-i cûd u gınâdır kim / Süleymanlar eder deryûze mûr-ı nâ-tüvânımdan

Aceb bir kûşe-gîr-i Kaf-ı istiğnâ-yı aşkım kim / Gelir pervâza ankalar der ü bâm-ı mekânımdan

Aceb bir can-fedâ-yı râh-ı istiğnâ-yı aşkım kim / Eder perverde ankayı hümâlar üstühânımdan

Vücûd âzürdedir hayretle sırrü’l-sırr-ı gaybımdan / Adem maʿdûmdur hacletle cism-i bî-nişânımdan

Anâsır münkeşif bir katredir bahr-i şühûdumda / Havâssı münbasit bir neşʾedir râz-ı nihânımdan

Safâ-yı ittisâʿ-ı kalb ile ol cevher-i ferdim / Ki mülk-i lâ-mekân bir noktadır kevn ü mekânımdan

Serâpâ gark-ı nûr-ı pertev-i tasdîk eder dehri / Şuâʿ-ı mihr-i illâ berk urup kâm ü dehânımdan

Dilim ol gevher-i gencîne-i mihr-i Hudâdır kim / Fürûzandır nücûm envâr-ı şemʿ-i pâsbânımdan

Aceb bir âlem-ârâ âfitâb-ı akl ü idrâkim / Ki peydâdır ser-â-pâ necm-i hikmet âsumânımdan

Dil-i pür-dâğ ile ol kevkeb-efrûz âsumânım kim / Bulur Cibrîl râh-ı arşı şevk-ı kehkeşânımdan

İşitenler kelâm-ı fâhrim fart-ı letâfetten / Sanırlar selsebîl-i feyz olur cârî zebânımdan

Aceb mi âşıkane bir gazel de eyleyip inşad / Akıtsam cûy-i hasret deşt-i tabʿ-ı mihribânımdan

Ebed pür-cûş olur hûn-ı şehâdet cism ü cânımdan / Açar bin lâle-i deşt-i Kerbelâ her katre kanımdan

Belâ ender-belâdır ol kadar cism-i nizârım kim / Ecel tersân olur hayretle merg-i nâgehânımdan

Değildir berk uran dâğ-ı derûnum mû-be-mû tende / Ayandır şûle-i mehtab her târ-ı kettânımdan

Sipend-i nâr-ı aşkım mihr ü encüm sanma gerdûnun / Tutuşmuş atlası yer yer yanar berk-ı çehânımdan

Ben ol âlûde-dâmân-ı mey-i aşkım ki ey Gâlib / Olur şahs-ı kazâ sermest-i hayret geçse yanımdan

Ben ol sahrâ-neverd-i Yûsuf-ı âmâlim bu âlemde / Ki kühl-i çeşm alır Yaʿkub gerd-i kârbânımdan

Ben ol ulvî-nijâd-ı himmetim aʿmâ-yı mâder-zad / Bulur nûr-ı basîret dûd-ı şemʿ-i hânedânımdan

Aceb bir şeb-çerâğ-ı dûdmân-ı mülk-i kudsüm kim / Halîlullah umar hân-ı şefâat mîzbânımdan

Yeter dünyâyı iʿcâz eyledin nazm ile ey hâme / Yeter mest oldu âlem câm-ı feyz-i câvidânımdan

N’ola bâğ-ı cihânda olsa mihr ü mâhtan meşhûr / Bu kıtʿam tâze bir güldür gülistân-ı beyânımdan